Madaxweynaha cusub oo weli degan Hotel & Shariifka oo ku sugan Villa
Madaxweynaha Cusub ee Soomaaliya Dr. Xasan Sheekh Maxamuud oo weli lagu wareejin xarunta looga taliya dalka ee Villa Somalia ayaa degan Hotelka Al-Jaziira ee ku agagaarka garoonka diyaaradaha Muqdisho ayaa noqdan kan ugu mashquul badan hoteelada Muqdisho, waxaana ka socda kulamo kala duwan.
Ergada Qaramada Midoobay iyo kuwa kor joogtada ka aheyd doorashada ayaa maanta kulamo kala duwan ay kula yeesheen Hotelka Al-Jaziira Madaxweyne Xasan Sheekh Maxamuud, iyagoo kala hadlay isbadalka cusub ee dalka ka dhacay iyo sida beesha caalamka ugu taageeri laheyd gudashada xilka cusub ee loo doortay.
Xubnaha Hotelka ku booqday waxaa ka mid ah Ergayga gaarka ee Qaramada Midoobay u qaabilsan Soomaaliya Augostnine Mahiga oo ugu hambalyeeyay guusha uu ka gaaray doorashadii xalay.
Sidoo kale waxaa kulamadaasi qeyb ka ah siyaasiyiin Soomaaliyeed oo xod xodasho ku wada Madaxweynaha cusub sidii ay isaga dhex arki lahaayeen dowladda cusub ee lasoo dhisi doono.
Odayaasha dhaqanka ee madala qabiilada Soomaaliyeed iyo Xildhibaano ayaa buux dhaafiyay Hotelka uu degan yahay Madaxweynaha, kuwaasi oo doonaya iney kulamo la yeeshaan.
Xarunta Villa Somalia ayaa waxaa weli ku sugan Madaxweynihii hore ee dalka Shariif Sh. Axmed, waxaana la filayaa in munaasabad ballaaran oo caleema saarka iyo xil wareejin ah ay ka dhici doonto xarunta Villa Somalia.
Dhinaca kale waxaa hoteelka uu degan yahay Madaxweynaha cusub Xasan Sheekh Maxamuud la wareegay amaankiisa ciidamada Dowladda KMG iyo kuwa AMISOM.
Email: warfaafiye@gmail.com
Posted by admin
on Sep 11 2012. Filed under Somali News.
You can follow any responses to this entry through the RSS 2.0.
You can leave a response or trackback to this entry